भक्ष्याच्या शोधात ८ फुटाचा साप अडकला जाळ्यात,जाळे कापून केली सापाची सुटका

कल्याण उंबर्डे गावातील गोदामाच्या जाळीत अडकला साप. भक्ष्याच्या शोधात ८ फुटाचा साप जाळ्यात अडकल्याची घटना घडली आहे. ही घटना कल्याण पश्चिम भागातील उंबर्डे गावातील एका गोदामात घडली असून सर्पमित्राने जाळे कापून या सापाची सुखरूप सुटका केली आहे.
बदलत्या हवामान व शेती जंगल भागात मोठमोठी गृहसंकुल झपाट्याने उभी राहत आहे. त्यामुळे विषारी बिन विषारी साप भक्ष्याच्या शोधात मानवीवस्तीत शिरत असल्याच्या घटना घडतच आहे. अश्याच एका घटनेत आठ फूट लांब असलेला साप उंबर्डे गावातील भोईर यांच्या गोदामात भक्ष्याच्या शोधात शिरला होता. सूरज भोईर गोदामातून साहित्य काढण्यासाठी गेले असतानाच, अचानक त्यांना हा भलामोठा साप जाळ्यात अडकल्याचे दिसतच त्यांनी बाहेर पळ काढला. त्यानंतर सर्पमित्र दत्ता बोंबे यांना संर्पक करून माहिती दिली. माहिती मिळताच सर्पमित्र बोंबे हे घटनास्थळी येऊन जाळे कापून या सापाला शिताफीने पकडून पिशवीत बंद केले. साप पकडल्याचे पाहून भोईर कुटूंबानी सुटकेचा निश्वास घेतला. हा साप धामण जातीचा असून याची माहिती कल्याण वन विभागाच्या अधिकाऱ्यांना देऊन या सापाला निर्सगाच्या सानिध्यात सोडल्याची माहितीही सर्पमित्र बोंबे यांनी दिली आहे.